O pasado 21 de xaneiro de 2019, representantes da Asociación profesional de funcionarios do Corpo Superior de Administración da Xunta de Galicia, do Sindicato de Empregados Públicos de Galicia (SEPGA), da Asociación de veterinarios Funcionarios da Xunta de Galicia da Asociación de letrados da Xunta de Galicia, da Asociación Profesional de Enxeñeiros Técnicos Agrícolas e Enxeñeiros Agrónomos, da Asociación de Biólogos e da Asociación profesional de inspectores urbanísticos de Galicia tivemos, a petición de AgrupA, celebramos unha reunión co conselleiro de Facenda e o director xeral da Función Pública en San Caetano para manifestar o noso malestar co acordo de concertación do emprego público de Galicia, no tocante á carreira administrativa.

 

A opinión das asociacións.

As asociacións manifestamos o descontento dos funcionarios do grupo A ante a discriminación que teñen levado a cabo ao aprobar unha carreira administrativa. A implantación través do sistema extraordinario nos seus graos I e II, establece unha diferenza entre o grupo A e o resto dos grupos ao prever un atraso en cada un deles dun ano no cobro efectivo do 100% do seu importe económico.


Como ben sabedes, necesitaremos 3 anos para consolidar o 100% das retribucións correspondentes ao grao I e  4 anos para consolidar o 100% das retribucións correspondentes ao grao II, mentres que no resto dos grupos a cadencia é de 2 e 3 anos respectivamente. Esta discriminación nos coloca ante unha perda de máis de 9.500 euros ao longo dos 7 anos nos que, no mellor dos casos, se consolidarán os dous primeiros graos que dan dereito á percepción destas retribucións.


Tamén incidimos na idea de que a carreira administrativa non pode converterse nun recoñecemento de antigüidade sen máis, senón que debe servir para motivar e dinamizar o traballo dos funcionarios públicos, un acicate para mellorar a nosa formación e as nosas capacidades.


Na reunión solicitamos que se articulase algunha vía compensatoria para compensar esta diferenza de trato co resto dos grupos (máxime cando no SERGAS, con importes iguais, a porcentaxe a cobrar dende o primeiro ano de consolidación do grao é do 100%).

A postura da Xunta de Galicia.

O conselleiro indicou que o acordo asinado era o máximo que se podía ofrecer dende a administración, recalcando que non podíamos falar dunha perda económica respecto dunha hipótese non real. Incidiu na importante diferencia de valor de cada grao (que oscila entre os 2.460 do A1 e os 761,52 das Agrupacións Profesionais) e explicou que se tiñan adoptado períodos de implantación diferentes nos graos I e II do réxime extraordinario por mor de equilibrar as porcentaxes de incremento resultantes nunhas bandas de incrementos homoxéneas entre os distintos grupos. Polo tanto, a secuencia de implantación diferente entre o grupo A1 e os grupos C1, C2 e agrupacións profesionais ten por obxecto equiparar as correspondentes porcentaxes de incremento salarial que comporta a implantación da carreira.


Con base nesta argumetación, xustificou a non discriminación en que as porcentaxes de incremento nos diferentes corpos era moi similar: Os importes económicos que se acreditan para os graos I e II do grupo A1 durante o período de implantación do réxime extraordinario representan incrementos salariais anuais na contorna do 2,8% e do 1,6%, respectivamente dos graos I e II e, facendo a mesma análise cos grupos que teñen períodos mais curtos de implantación dos graos I e II (2-3 anos fronte aos 3-4 do grupo A1) se observan porcentaxes de incremento salarial que se sitúan en bandas moi semellantes (1,7% e 2,6%).

Conclusións


Dende as  asociacións recalcamos de que a diferenza nos importes de cada grupo é unha cuestión acorde coas diferenzas salariais e de responsabilidade que cada grupo asume, a pesares de que os sindicatos tiveran presionado para establecer un sistema lineal para todos os funcionarios públicos, e que ademais son importes xa aprobados na carreira do SERGAS.

Cabe lembrar que en data 30/11/2018 presentaramos un escrito conxunto Agrupa e Veterinarios cunha proposta de carreira na que tiña en conta a antigüidade dos empregados públicos á hora de acceder de modo extraordinario aos diferentes graos da carreira, sen diferenzas entre corpos.

Para coñecer a vosa opinión, estamos a realizar unha enquisa vinculante entre todos os socios/as. Non deixedes de participar clicando na ligazón que vos chegue ao voso correo electrónico.