Entra en vigor o decreto que regula a administración electrónica

Dende o pasado 31 de marzo publicouse no BOE o Real Decreto 203/2021, de 30 de marzo, polo que se aproba o Regulamento de actuación e funcionamento do sector público por medios electrónicos. Coa súa publicación desenvolvese a Lei 39/2015, do 1 de outubro, do Procedemento Administrativo Común das Administracións Públicas, e a Lei 40/2015, do 1 de outubro, de Réxime Xurídico do Sector Público.

Este Regulamento persegue catro grandes obxectivos: mellorar a eficiencia administrativa, incrementar a transparencia e a participación, garantir servizos dixitais facilmente utilizables e mellorar a seguridade xurídica.

A Lei 39/2015 e a Lei 40/2015 consagran o dereito das persoas para relacionarse por medios electrónicos coas administracións públicas, simplificando o acceso aos mesmos, e reforzan o emprego das tecnoloxías da información e as comunicacións (TIC) nas administracións públicas, no sentido de que a tramitación electrónica dos procedementos debe constituír a actuación habitual das Administracións Públicas, e non soamente ser unha forma especial de xestión dos mesmos. En consecuencia, establécese a obrigatoriedade de relacionarse electronicamente coa Administración para as persoas xurídicas, entes sen personalidade e, nalgúns supostos, para as persoas físicas, e iso sen prexuízo da posibilidade de estender esta obrigación a outros colectivos, por vía regulamentaria.

Con estes antecedentes, era necesario desenvolver e concretar as previsións legais co fin, entre outros aspectos, de facilitar aos axentes involucrados no uso de medios tecnolóxicos a súa utilización efectiva, aclarando e precisando, ao mesmo tempo, aquelas materias reguladas nestas leis que permiten unha marxe de actuación regulamentaria.

A satisfacción do interesado, por tanto, no uso dos servizos públicos dixitais é fundamental para garantir adecuadamente os seus dereitos e o cumprimento das súas obrigacións na súa relación coas Administracións Públicas. Por iso, é prioritario dispoñer de servizos dixitais facilmente utilizables e accesibles, de modo que se poida conseguir que a relación do interesado coa Administración a través da canle electrónica sexa fácil, intuitiva, efectiva, eficiente e non discriminatoria.

O Regulamento é de obrigado cumprimento para todas as administracións públicas e entrou en vigor o 2 de abril.