A carreira profesional da Xunta de Galicia pode ser inconstitucional.

O pasado 31 de maio publicouse no DOG o acordo da comisión bilateral de cooperación entre Administración Xeral do Estado-Comunidade Autónoma de Galicia. Este acordo está relacionado co inicio de negociacións para estudar o desenvolvemento da carreira profesional do persoal funcionario da nosa comunidade autónoma realizado na Lei 3/2018, do 26 de decembro, de medidas fiscais e administrativas.

A representación do Estado sinala que a regulación da carreira profesional realizada pola Xunta de Galicia invade competencias exclusivas estatais. En consecuencia a normativa autonómica podería ser obxecto dun recurso ante o Tribunal Constitucional que, en caso de prosperar, implicaría a máis que probable declaración de inconstitucionalidade da norma que ampara esta mellora retributiva.

Representantes da Asociación contactaron coa Dirección Xeral de Función Pública para aclarar a situación que se presenta en relación a este tema. Dende o centro directivo asegurase que a carreira profesional non corre perigo. Admiten a posibilidade de que sexa necesaria algunha modificación lexislativa para adaptar a definición do concepto retributivo sen que implique merma ou perda do dereito no futuro.

Confiamos e esperamos que finalmente se chegue a un acordo entre o Ministerio de Política Territorial e Función Pública e a Xunta de Galicia que permita salvagardar o acordo existente, a pesar de que sexa un mal acordo e manifestamente discriminatorio respecto das persoas integrantes corpo superior.

Dende a Asociación estaremos atentos ao desenvolvemento das actuacións por parte da Dirección Xeral da Función Pública para evitar a vulneración dos nosos dereitos.