Celebración do XXV aniversario da promoción de 1993

Na tarde do venres 9 de novembro celebramos no Salón de Actos da Escola Galega de Administración Pública o acto de homenaxe polos 25 anos da publicación do nomeamento como funcionarios de carreira das persoas integrantes da promoción de 1993. O aniversario, organizado pola nosa Asociación, contou coa presenza do Presidente da Xunta de Galicia, do ex-conselleiro Dositeo Rodríguez Rodríguez, conselleiro de Presidencia e Administración Pública nese ano,  e de Carlos Negreira Souto, que falou en nome dos integrantes da promoción na súa condición de número 1 desta.

O acto comenzou coa interpretación do tango “Por una cabeza” da película que no ano 1993 gañou o Oscar ao mellor actor principal,  que simbolizou a incerteza de todos os que estudan unha oposición e que arriscan o seu futuro a unha carta. O acto rendía homenaxe as máis de catrocentas historias de éxito daquela promoción. A continuación, o presidente da Asociación, Pablo Amenedo, interviu  destacando no seu discurso o agradecemento aos homenaxeados por ser os nosos mestres, pola súa axuda e tutela, por compartir a súa experiencia e entusiasmo para mellorar e pola dedicación e esforzo destes 25 anos. Asimesmo resaltou que as gañas e ideais desa xeración de funcionarios/as é fundamental para ser quen de continuar o proceso de adaptación da administración a todos os cambios que se están a producir e aos que se aveciñan para o curto e o medio prazo.

De seguido, proxectouse un vídeo, salpicado de notas de humor,  no que se mostrou o cambio que se ten producido tanto na sociedade como na administración nestes 25 anos e o papel desempeñado polos funcionarios neste importante proceso evolutivo.

Na segunda intervención, Don Carlos Negreira centrou a súa intervención na importancia de coidar das persoas dentro de calquera  organización e agradeceu aos organizadores o feito de celebrar a efeméride. O ex conselleiro Dositeo Rodríguez fixo un repaso polos compricados inicios da administración pública galega e salientou a importancia do diploma de directivo que el instaurou como xeito de abrir outras perspectivas aos funcionarios públicos.

Por último, o Presidente da Xunta de Galicia salientou o fundamental que é o labor diario de todos os funcionarios e funcionarias para achegar a Administración aos administrados. Tamén incidiu en que a creación normativa e polo tanto das políticas públicas é o froito do esforzo persoal dos empregados públicos.

Tras esta intervención o trío Minuetto voltou a interpretar un repertorio de pezas musicais, mestura de música popular galega e de referencias ao cine do ano 1993. O acto culminou cun cocktail na EGAP onde todas as persoas asistentes puideron reencontrarse e rememorar vellos tempos e aproveitar a ocasión para fortalecer os vínculos entre os compañeiros do corpo.

Dende a Asociación de Funcionarios do Corpo Superior damos as gracias a todos os asistentes e convidamos aos que aínda non forman parte da asociación, a que se unan a nós.