Asemblea Xeral Extraordinaria do 2021

O pasado venres 26 de novembro tivo lugar a Asemblea Xeral Extraordinaria convocada para o efecto días atrás. A asemblea reunida en segunda convocatoria serviu de punto de partida para relanzar as actividades da Asociación de cara ao futuro. A reunión desenvolveuse segundo o previsto e cabe destacar a aprobación por unanimidade tanto da acta da sesión anterior de marzo de 2019 como a liquidación de contas dos anos 2019 e 2020.

A Xunta Directiva informou sobre a convocatoria de eleccións para o ano 2022 e a invitación a todas as persoas asociadas para que conformen a súa propia candidatura ou se unan á actual. Neste sentido, deuse conta da renuncia de Zeltia Lado Lago como membro da Xunta Directiva, por incompatibilidade establecida nos estatutos, e da futura incorporación da socia Marta Figueiras García como vogal no seu lugar.

Os principais puntos da Asemblea versaron en dar conta sobre as accións e proxectos realizados durante os anos 2019 e 2020 entre os que destacamos os seguintes:

• O mantemento da colaboración con outras asociacións e co Sindicato de Empregados Públicos de Galicia (SEPGA).
• A participación de socios/as en tribunais de oposición
• Os escritos dirixidos á Dirección Xeral de Función Pública en defensa dos nosos intereses en especial pola rebaixa de requisitos esixidos na última convocatoria de acceso ao Corpo Superior, así como a discriminación na implantación da carreira profesional.
• A realización dunha revisión e actualización do temario de acceso ao Subgrupo A1 para enviar como proposta á Dirección Xeral de Función Pública.
• A realización dunha doazón ao SERGAS nos primeiros meses da pandemia.
• As comunicacións realizadas ás persoas asociadas por medio da nosa páxina web en materia de formación ou a creación e fallo do I Premio de Investigación da Asociación.
• A realización de propostas á EGAP para a organización de cursos de formación do que resultou a impartición de dous cursos: “Deseño de pregos de cláusulas administrativas particulares. Especial referencia as cláusulas sociais e medioambientais.” e “A axilidade na contratación pública: contratación menor e procedemento aberto simplificado.“

A reunión continuou coa orde do día na que se deu conta do I Premio de Investigación Agrupa que foi a Enrique Álvarez Romero polo traballo titulado “Regulación de los convenios de colaboración/cooperación en la legislación de la Comunidad Autónoma de Galicia”; deuse a benvida aos novos socios/as e abriuse un interesante debate sobre os futuros obxectivos da Asociación tendo en conta a existencia do sindicato SEPGA.

A continuación, para finalizar o acto, representantes da Unión de Consumidores de Galicia mantiveron unha animada  charla-coloquio con información moi útil sobre reclamacións á banca (gastos hipotecarios) e aos fabricantes de vehículos por prácticas de fixación de prezos.