Cambios normativos en administración dixital

O mércores 6 de novembro de 2019 entra en vigor o Real Decreto-lei 14/2019, do 31 de outubro, polo que se adoptan medidas urxentes por razóns de seguridade pública en materia de administración dixital, contratación do sector público e telecomunicacións, publicado no BOE núm. 266, do 5 de novembro de 2019.

Tal e como figura na súa parte expositiva, a sociedade actual require de adaptacións na esfera dixital que exixen dunha tradución no plano normativo. O desenvolvemento e emprego das novas tecnoloxías e redes de comunicacións por parte das Administracións Públicas estase acelerando. Iso exixe establecer sen demora un marco xurídico que garanta o interese xeral e, en particular, a seguridade pública, garantindo a axeitada prestación dos servizos públicos e, ao mesmo tempo, que a administración dixital se empregue para fins lexítimos que non comprometan os dereitos e liberdades dos cidadáns.

Neste senso, o Real Decreto ten como obxecto regular ese marco normativo, introducindo medidas urxentes relativas a documentación nacional de identidade; a identificación electrónica ante as Administracións Públicas; aos datos que obran en poder das Administracións Públicas; a contratación pública e ao sector das telecomunicacións.

Estas medidas supoñen a introdución de diversas modificacións que afectan ás seguintes leis e disposicións normativas: Lei Orgánica 4/2015, de 30 de marzo, de protección da seguridade cidadá, Lei 59/2003, de 19 de decembro, de firma electrónica, Lei 39/2015, do 1 de outubro, do procedemento administrativo común das Administracións Públicas, Lei 40/2015, do 1 de outubro, de réxime xurídico do sector público, Lei 9/2017, de 8 de novembro, de contratos do sector público, pola que se traspoñen ao ordenamento xurídico español as Directivas do Parlamento Europeo y del Consejo 2014/23/UE, de 26 de febreiro de 2014, Lei 9/2014, de 9 de maio, xeral de telecomunicacións e Real Decreto-lei 12/2018, de 7 de setembro, de seguridade das redes e sistemas de información.

Ademais a norma recolle un réxime transitorio en relación á entrada en vigor das diversas modificacións introducidas respectivamente na Lei 39/2015, do 1 de outubro, do procedemento administrativo común das Administracións Públicas, Lei 40/2015, do 1 de outubro, de réxime xurídico do sector público e na Lei 9/2017, de 8 de novembro, de contratos do sector público, pola que se traspoñen ao ordenamento xurídico español as Directivas do Parlamento Europeo y del Consejo 2014/23/UE, de 26 de febreiro de 2014.