O traballador despedido ten un ano de prazo para actuar en caso de notificación defectuosa dunha Administración pública.

O Tribunal Supremo (TS) ven de decidir dúas cuestións importantes en casos de despido realizados por unha Administración pública. Hai que matizar que o suposto de feito parte dunha notificación defectuosa, xa que esta non indicou ao despedido cales eran os mecanismos de resposta cos que contaba (clase de recursos cabía interpoñer nin de que prazo dispoñía para iso). O persoal laboral presentou unha demanda máis alá dos 20 días establecidos para as accións de despido no Estatuto dos Traballadores, xa que considerou que a presentación dunha reclamación previa á vía administrativa interrompera o prazo de caducidade.

Por unha banda, o TS considera que a interposición dunha reclamación previa á vía administrativa non é un acto válido para renovar o prazo de caducidade dunha acción. Xa que logo, mantense suspendido o prazo de caducidade ata que a persoa afectada interpoña calquera recurso que proceda sen que a desaparecida vía de reclamación previa sexa hábil para cumprir ese requisito.

En segundo lugar, e máis relevante, o TS pon fin á discordancia que existía entre distintas correntes xurisprudenciais sobre o prazo que se debía de dar para poder recorrer un despedimento feito por unha Administración Pública cando a notificación é defectuosa.

A decisión do TS inclinase por establecer que o prazo para poder demandar esténdese ata un ano por aplicación supletoria do art. 59 do Estatuto dos Traballadores (ET) que dispón que “as accións derivadas do contrato de traballo que non teñan sinalado prazo especial prescribirán ao ano da súa terminación”.

En definitiva, no ordenamento actual, sendo empregadora unha Administración Pública, a notificación do acto de despedimento sen indicar vía e prazo de impugnación, mantén suspendido o prazo de caducidade ata que o traballador o impugne pola vía procedente coa interposición da demanda, para o que opera o prazo de prescrición dun ano supletoriamente fixado polo artigo 59.1 ET.

Podedes seguir a argumentación do TS na sentencia completa.