A sentenza que traemos sinala a relevancia de ter en conta a lei e o procedemento por riba das aplicacións informáticas que se empregan para tramitar os expedientes.
O Tribunal Supremo na súa sentenza núm. 960/2023 do 12 de xullo de 2023 resolve un recurso de casación contra unha sentenza do Tribunal Superior de Xustiza de Andalucía. Os feitos veñen a relatar que as persoas recorrentes foron excluídas dun concurso de méritos porque non asinaron dixitalmente a súa solicitude de inclusión como participantes no dito concurso. As recorrentes alegan que o sistema informático non aclaraba se era necesario este paso e daba a entender que o trámite estaba completo ao xerar a solicitude, logo do pago das taxas.
A Administración demandada argumenta que o deseño do programa informático determina a exclusión.
Finalmente o Tribunal Supremo admite o recurso de casación e ordena a admisión no proceso selectivo ás recorrentes xa que entende que a Administración non pode escudarse no modo en que foi deseñado o correspondente programa informático para eludir o cumprimento dos seus deberes fronte aos particulares, nin para erosionar as garantías do procedemento administrativo. O Alto Tribunal entende que a Administración debe, en todo caso, dar a posibilidade de corrección cando o interesado reacciona fronte á súa non inclusión na lista de admitidos e acredita que só omitiu o paso final, isto é, a sinatura electrónica e o rexistro da súa solicitude
Ao marxe do interese da propia sentenza pola materia concreta sobre a que recae, esta pode servir de guía ante a dúbida de que facer cando alguén queda fóra dunha convocatoria porque alega que non funcionaba a sede electrónica, o SILEX, etc.
No Comment! Be the first one.